أنا عبلّيني : بقلم زهير دعيم
(ذكريات...قبل اكثر من عِقدين من الزمن)
أنا عبلّيني يا بَشَر
بالحُبّ قلبو ما انكسر
كلّ الخليقة بتشهدلي
في العلم في عندي نَظَر
فلاح وزرعاتي جنّه
بحياتي دومًا متهنّي
ما برضى الظُّلم والعنّه
ينفلق عدوّي وينقَهَر
عّ درب السِّلم أنا ماشي
وحُبّ الناس وسواسي
فوق الغيْمات يا راسي
تْغير النجمات والقَمَر
مفتون بتلال بلادي
بالعزّ وبتراب اجدادي
وبالآه من فم الوادي
يطرب الطّير والحَجَر